Malampusong gipahigayon sa Dapitan City Parole and Probation Office ang duha ka adlaw nga Livelihood and Education Access Program (LEAP) niadtong Septiyembre 15 ug 16, 2026, sa Dapitan Hotel, Dapitan City.
Gitumong ang programa sa paghatag og kahibalo, kahanas, ug mga oportunidad sa mga probationer ug parolee aron makatabang sa ilang rehabilitasyon, pagpalambo sa kaugalingon, ug malampusong pagbalik sa komunidad.
Ubos sa pagpanguna ni CPPO Nelson C. Bedua, ug sa paggiya nila ROIC Amités B. Butiong ug OIC/ARD Alyssa May Z. Comique, aktibong mitambong ang mga kliyente sa nagkalain-laing kalihokan ug diskusyon nga nagpunting sa livelihood, employment opportunities, ug mga serbisyo nga ilang mahimong ma-access.
Gidapit usab sa Opisina ang mga resource person gikan sa Department of Science and Technology (DOST), Public Employment Service Office (PESO), ug City Anti-Drug Abuse Council (CDAC) aron ipaambit ang importante nga impormasyon bahin sa panginabuhian, trabaho, ug suporta alang sa mga partisipante.
Gipahinumdoman usab ni CPPO Josilyn Bael (Ret.) ang mga partisipante sa ilang mga obligasyon ug sa mga kondisyon nga gipatuman sa korte, lakip na ang importansya sa hugot nga pagsunod niini sulod sa panahon sa ilang supervision.
Pinaagi sa maong programa, gihatagan ang mga probationer ug parolee og oportunidad nga makakat-on og bag-ong mga butang, makaila sa mga posibilidad sa panginabuhian ug trabaho, ug makadawat og suporta nga makatabang sa ilang pagbag-o ug pag-andam alang sa mas maayong kaugmaon.
Ang LEAP nahiuyon usab sa Peace and Order and Public Safety advocacy sa City Government of Dapitan, ubos sa pagpanguna ni Hon. Evelyn T. Uy, pinaagi sa pagpalig-on sa rehabilitasyon, pagpalambo sa kapasidad sa mga kliyente, ug paghatag og mga oportunidad nga makatabang sa pagpugong sa pagbalik sa kalapasan.(IKEN B. GULLEM)
Source: Dapitan City Government