Gibutyag atol sa flag raising ceremony sa Kapitolyo sa Dipolog City ang umaabot nga ika-33 National Children’s Month Celebration sa lalawigan sa Zamboanga del Norte. Ang maong kalihukan ipahigayon karong Nobyembre 24 sa Zamboanga del Norte Convention and Sports Center, diin ipahayag ni Gobernador Darel Dexter T. Uy ang iyang State of the Children Address o SOCA.
Sa samang adlaw, ipatuman usab ang unang paghatag og pinansyal nga tabang alang sa mga kabataang adunay mga kalisdanan sa panglawas aron masuportahan ang ilang therapy, tambal, ug uban pang medikal nga panginahanglan. Nagdala kini sa tema nga “OSAEC-CSAEM WAKASAN: Kaligtasan at Karapatan ng Bata, Ipaglaban!” nga nag-awhag sa publiko sa pagpakigbatok batok sa online sexual abuse ug exploitation sa mga kabataan.
Padayon usab ang inisyatibo sa probinsyal nga pangagamhanan pinaagi sa PSWDO ubos sa pagdumala ni Acting PSWDO Hanna Lou G. Mandantes, uban ang suporta ni Gobernador Darel Dexter T. Uy, aron mapalambo ang mga programa nga nagpanalipod sa katungod ug kaayohan sa kabataan — ang tinuod nga paglaum ug kaugmaon sa katilingban.(JENIFFER JR. DELICA)
Source: Zamboanga del Norte Provincial News Network