Gipukaw ni Governor Darel Dexter T. Uy ang determinasyon sa kapin sa usa ka gatus nga kabatan-onan sa pag-abli sa 2025 Provincial Youth Summit, diin iyang gimandoan nga kinahanglan sila mahimong aktibong kaabag sa mga programa sa probinsya ug dili lamang mga manan-aw sa kalamboan.
Ang tulo ka adlaw nga panagtigum sa Zamboanga del Norte Convention and Exhibition Center (ZNCEC) nagdala sa mga youth representatives gikan sa lain-laing lungsod ug syudad, uban ang ilang mga lider sa Pag-asa Youth Association of the Philippines (PYAP). Human sa mainit nga welcome ni Acting PSWDO Hannah Lou Mandantes, mitungha si 2nd District Representative Irene “Ate Ai” Labadlabad aron ipahinumdom sa kabatan-onan nga ang liderato dili magsugod sa posisyon, kondili sa disiplina ug pag-andam sa kaugalingon.
Gisugdan ang diskusyon pinaagi ni Ms. Diana Racquel Acaylar nga naghisgot sa sensitibo pero hinungdanong hilisgutan sa Protection from Sexual Exploitation and Abuse (PSEA). Gisundan kini sa serye sa mga lecture nga naglangkob sa mental health, anti-drug abuse, gender-based violence, ug HIV awareness—mga isyung kasagarang giatubang sa kabatan-onan karon. Ang matag sesyon nagtumong sa paghatag og kahibalo nga magamit nila sa eskwelahan, komunidad, ug personal nga kinabuhi.
Sa iyang mensahe, gipunting ni Gov. Uy nga ang kalampusan sa probinsya mosalig usab sa kahimsog, kinaadman, ug integridad sa kabatan-onan. Giawhag niya sila sa paglikay sa bisyo, ilabi na sa iligal nga droga, ug sa pagpangita og mga kalihokan nga makapalambo sa ilang abilidad. Sa katapusan sa summit, ipahigayon ang PYAP Provincial Election, uban ang paghatag sa mga certificate ngadto sa tanang mitambong isip pag-ila sa ilang partisipasyon. (JENIFFER JR. DELICA)
Source/Photo Courtesy: PIC/RJG, Zamboanga del Norte Provincial News Network