Wa na maka ipsot sa kamot sa mga tinugyanan sa balaod ang usa Wi-fi Installer homan kini masikop atol sa buy-bust operation nga gipatoman sa mga personahe sa kapulisan niadtong Marso 16, 2026 mga alas 9:02 ang takna sa gabii didto sa Purok Daisy, Brgy. Sicayab, Dipolog City, Zamboanga del Norte.
Ang nadakpan nga suspek naila nga usa ka 31 anyos nga lalaki, ulitawo, PLDT WiFi installer, ug residente sa Purok Bougainvilla, Brgy. Sicayab, Dipolog.
Ang pagkadakop sa nasangpit nga suspek gihimo pinaagi sa Dipolog City Police Station (SDET) isip lead unit, uban sa koordinasyon sa Zamboanga del Norte 1st PMFC, 5th SOU Mabuhay SBC ZDN MARPSTA, Regional Drug Enforcement Unit 9, ug sa Philippine Drug Enforcement Agency (PDEA) 9.
Atol sa operasyon nakumpiska sa kapulisan gikan sa suspek ang gibana-bana nga kapin o kulang 2.5 gramos sa gituohang shabu nga gibanabanang nagkantidad sa Php 17,000.00, lakip ang mga butang nga dili druga.
Ang dinakpan gipahibalo sa hinungdan sa iyang pagkadakop ug mga katungod sa konstitusyon sa pinulongan nga iyang nasabtan ug ang mga nakumpiska nga droga gitugyan ngadto sa Zamboanga del Norte Provincial Forensic Unit alang sa laboratory examination.
Samtang ang dinakpan nga suspek anaa karon sa kustodiya sa Dipolog CPS alang sa hustong disposisyon. (MEDALYN U. BORJA)