Mipahayag sa ilang dakong pasalamat ang World Health Organization (WHO) ug ang Department of Health (DOH) kang City Mayor Roberto Y. Uy tungod sa iyang lig-on nga suporta sa implementasyon sa Measles–Rubella Supplemental Immunization Activity (MR-SIA) sa siyudad.
Atol sa gihimong panagtagbo, niadtong Pebrero 12, 2026, sa opisina sa mayor, personal nga mipahayag og pasalamat si WHO Consultant Dr. Namrata Bhatta uban si DOH Provincial Health Officer Dr. Ellaine Jean Erfe-Rodriguez ug ang mga kawani sa City Health Office (CHO) nga gipangulohan ni Assistant City Health Officer Dr. Frances Anne A. Bustillo.
Gipasabot sa grupo ang kahimtangan ug resulta sa kampanya sa MR-SIA sa Dipolog City, nga nagtumong sa pagpalig-on sa proteksyon batok sa tipdas ug rubella ilabina sa kabataan. Matod pa nila, dako ang natabang sa padayon nga suporta sa lokal nga panggamhanan aron masiguro ang malampusong pagpatuman sa programa.
Gipasalamatan usab nila ang paningkamot sa City Government of Dipolog sa pagpalihok sa mga barangay health workers ug sa pagpalambo sa information drive aron madani ang mas daghang ginikanan nga pabakunahan ang ilang mga anak.
Gipahayag usab ni Mayor UY ang padayon nga suporta sa siyudad sa mga programa sa panglawas sa DOH ug WHO, ilabina ang mga inisyatiba nga nagpanalipod sa kahimsog sa kabatan-onan.(IKEN B. GULLEM)
Source: Dipolog City Government