Gipasiugdahan sa lokal nga kagamhanan sa Dapitan ang mas lig-on nga kampanya batok sa online child sexual abuse ug exploitation pinaagi sa usa ka information drive ug policy orientation nga gipahigayon sa Amphitheater sa Government Center.
Kabahin kini sa pagsaulog sa ika-30 nga National Awareness Week for the Prevention of Child Sexual Abuse and Exploitation, nga gipangulohan sa City Social Welfare and Development Office (CSWDO) ubos sa liderato ni Ms. Marilyn Sy ug sa suporta ni Mayor Evelyn T. Uy.
Imbis nga usa lamang ka simple nga symposium, gihimo kini nga usa ka working orientation alang sa mga empleyado sa syudad aron mapalig-on ang ilang kahibalo sa pag-ila ug pagresponde sa kaso sa Online Sexual Abuse and Exploitation of Children (OSAEC).
Gihatagan og overview ni Ms. Janice O. Bencila ang kahimtangan sa OSAEC sa nasud, samtang gipatin-aw ni Atty. Meriam W. Quimbo ang mga probisyon sa Republic Act 11930 nga nagpalig-on sa proteksyon sa kabataan ug nagpatuman og mas bug-at nga silot batok sa mga nakasala.
Sumala sa city government, padayon ang paningkamot sa Dapitan sa pagpalig-on sa child protection ug pagpanalipod sa kabataan batok sa bisan unsang porma sa pagpang-abuso.(IKEN B. GULLEM)
Source: City Government of Dapitan