Gisugdan niadtong Oktubre 20, 2025 ang voter registration sa Dapitan City nga molungtad hangtud Mayo 18, 2026, aron andamon ang mga botante sa umaabot nga eleksyon.
Gipahibalo kini ni Atty. Crystha Joyce Marie S. Tormis, Election Officer sa Dapitan, atol sa regular nga flag raising ceremony. Ang rehistrasyon abli matag adlaw gikan alas 8:00 sa buntag hangtod alas 5:00 sa hapon, lakip ang Sabado ug mga holiday.
Gi-awhag ni Tormis ang tanan nga kwalipikadong Dapitanon nga magparehistro ug magdala ug valid government-issued ID, samtang gibawal ang paggamit sa Cedula, Barangay Certificate, Company ID, ug PNP Clearance isip balidong ID. Abli usab ang SK registration alang sa mga edad 15 pataas.
Samtang nagpadayon ang aktibidad, gipahibalo usab sa Dapitan City Government Employees Association Multi-Purpose Cooperative (DCGEA MPC) nga ipahigayon ang Culmination Program sa Cooperative Month 2025 karong Oktubre 25, uban sa motorcade gikan sa Government Center padulong sa JRMSU Covered Court.
Pinaagi sa maong kalihokan, gipakita sa Dapitan City ang aktibong partisipasyon ug panaghiusa sa katawhan, timaan sa padayon nga kalamboan ug pagtinabangay sa dakbayan.(Iken B.Gullem)
Source: Dapitan City Information Division