Gipasidunggan sa Maritime Industry Authority (MARINA) si Dapitan City Mayor Evelyn T. Uy tungod sa iyang mahinungdanong kontribusyon sa pagpalambo sa maritime sector sa Pilipinas.
Ang pasidungog gihatag atol sa MARINA Fellowship Night niadtong Oktubre 3, 2025, diin giila si Mayor Uy isip usa sa mga distinguished awardees nga adunay dakong papel sa pagpalig-on sa maritime development sa Dapitan City, ilabi na sa mga inisyatiba nga may kalabotan sa pagpaayo sa pantalan, pagtabang sa mga komunidad sa baybayon, ug pagpanalipod sa kinaiyahan sa dagat.
Ubos sa iyang liderato, ang Dapitan City nakapasiugda ug nagkalain-laing proyekto nga nagtinguha sa pagpaayo sa maritime accessibility, pagpalambo sa marine tourism, ug pagpangusog sa panginabuhian sa mga mananagat.
Samtang padayon nga gipalig-on sa Pilipinas ang kapasidad niini sa maritime sector, ang mga lokal nga pangagamhanan sama sa Dapitan City gihulagway isip mahinungdanong kaabag sa pagpanguna ug pagpatuman sa malungtarong mga polisiya ug praktis nga nagatuman sa internasyonal nga maritime standards.
Kini nga pasidungog nagpalig-on sa panulondon ni Mayor Evelyn Uy isip usa ka aktibo ug may panan-aw nga lider nga masaligon sa inklusive ug malungtarong kalamboan, dili lamang sa Dapitan City apan sa mas halapad nga maritime nga sektor sa Pilipinas.(Iken B. Gullem)
Source: Zamboanga del Norte Provincial News Network