Human sa kapin pito ka tuig nga pagpangita, nadakpan na sa kapulisan ang usa ka 37-anyos nga lalaki nga giingong usa sa National Most Wanted Person sa nasud.
Ang suspetsado gidikop sa mga otoridad subay sa Warrant of Arrest alang sa kaso nga Murder nga giisyu sa Regional Trial Court, Branch 44, Tacloban City niadtong Hunyo 21, 2018, nga adunay “No Bail Recommended.”
Ang operasyon gihimo pinaagi sa joint forces sa Waterfront Police Station 3, Regional Intelligence Units 7 ug 8, PIT Leyte, Cebu PIT, RID PRO-8, 34th SAC, 3 SAB PNP SAF, 805th MC, 2nd LMPC, ug PIU-LLPO. Human sa maong operasyon, ang akusado kasamtangang gidetener sa Waterfront Police Station 3 samtang naghulat nga ipresentar sa korte.
Sumala sa taho, ang maong lalaki nalakip sa ika-11 nga puwesto sa listahan sa National Most Wanted Persons nga giisyu sa Department of the Interior and Local Government (DILG). Sa panahon sa pagsikop gipahibalo usab kaniya ang iyang mga katungod ubos sa Miranda Doctrine.
Si Police Colonel Enrico Evangelista Figueroa, Acting City Director sa Cebu City Police Office (CCPO), mipadayag sa iyang pagpasalamat ug pagdayeg sa mga pulis sa Waterfront Station sa ilang walay kakapoy nga serbisyo ug dedikasyon sa pagdakop sa mga pinakasikat nga wanted sa nasud.
Gimandoan usab ni PCOL Figueroa ang tanang yunit sa kapulisan sa Cebu City nga padayonon ang kampanya batok sa mga wanted persons aron mapalig-on pa ang kalinaw ug kasiguroan sa dakbayan.
Source: CPPO
I via Renante Socia Lada