Bisan pa sa ulan nga nasinatian, opisyal nga giablihan sa Local Government Unit sa Gutalac ang Volleyball Tournament isip kabahin sa selebrasyon sa 47th Araw ng Gutalac niadtong Pebrero 22, 2026.
Gipangulohan ang kalihokan sa Municipal Mayor nga si Eddie Justin Quimbo, nga mitambong sa pagbukas ug mipadayag og suporta sa mga nagkalain-laing teams nga miapil sa maong torneyo. Matud pa sa LGU, ang kusog nga ulan wala makapugong sa kadasig sa mga manlalaro ug mga supporters nga nagpakita gihapon og aktibong partisipasyon sa unang adlaw sa kompetisyon.
Gipasabot usab ni Mayor Quimbo nga ang torneyo dili lamang alang sa pagdaog og tropeyo ug medalya, kondili usa usab ka higayon sa pagpalig-on sa panaghigalaay, panaghiusa, ug camaraderie sa komunidad. Gilauman nga ang maong torneyo makahatag og dugang kalingawan ug inspirasyon sa katawhan atol sa kasaulogan.
Samtang, ang Volleyball Tournament usa lamang sa daghang sports activities nga giandam alang sa 47th Araw ng Gutalac, isip kabahin sa padayon nga paningkamot sa lokal nga panggamhanan sa paghatag og mga kalihokan nga nagpalig-on sa panaghiusa ug partisipasyon sa komunidad.(IKEN B. GULLEM)
Source: LGU Gutalac-Public Information