Aron masiguro nga andam sa bisan unsang matang sa emerhensiya, ang mga kawani sa Department of Agrarian Reform Provincial Office (DARPO) Zamboanga del Norte mipailalom sa komprehensibong Basic Life Support (BLS) ug Standard First Aid training, lakip ang fire drill ug re-orientation sa fire safety.
Ubos sa pagpangulo ni Provincial Agrarian Reform Program Officer (PARPO) II Daisy Dell Suan Digamon, gipahigayon ang maong kalihokan aron mapalambo ang kahibalo ug kahanas sa mga empleyado sa hustong pagtubag sa mga emerhensiya.
Kini nga pagbansay gipasiugdahan sa City Disaster Risk Reduction and Management Office nga gipangulohan ni N Dwight P. Daguman, uban sa mga training specialists nga sila Ace Gabriel T. Acal ug Renato A. Velasco Jr..
Sa maong pagbansay, ang mga partisipante nakakat-on sa saktong pamaagi sa paghatag og unang tabang, lakip ang cardiopulmonary resuscitation (CPR), pag-atiman sa wala’y panimuot nga pasyente, ug pagdumala sa mga sitwasyon sama sa choking ug kalit nga paghunong sa pagginhawa. Gihatagan og gibug-aton ang kahinungdanon sa dali ug episyenteng aksyon aron makaluwas og kinabuhi samtang wala pa moabot ang propesyonal nga medikal nga tabang.
Dungan niini, ang mga kawani gikan sa Bureau of Fire Protection nga gipangulohan nila Mark Jefferson S. Canggas ug Bayani B. Ano-os nagpahigayon usab og fire safety lecture ug fire drill aron mas mapalalom ang kahibalo sa hustong paglikay ug pagresponde sa sunog.(IKEN B. GULLEM)
Source: DAR Zambonorte