Nagpahayag og dako ug dakong pasalamat ang Local Government Unit sa Sindangan ug ang katawhan niini sa Philippine National Police (PNP) sa paghatag og bag-ong 4×4 police patrol car alang sa Sindangan Municipal Police Station.
Mipadayag sa iyang pasalamat si Mayor Glona G. Labadlabad, nga miila sa maong suporta isip dakong tabang sa pagpalig-on sa seguridad sa lungsod. Sumala sa LGU, ang paghatag sa patrol vehicle nagpakita sa padayon nga pagtagad sa PNP sa panginahanglan sa mga komunidad sa probinsya.
Kini nga donasyon gipasiugdahan sa Philippine National Police pinaagi sa pagpangulo ni Edwin A. Quilates, Regional Director sa PRO 9, ug ni Reydante E. Ariza, Provincial Director sa Zamboanga del Norte.
Gidawat ang patrol car sa Sindangan MPS nga gipangulohan ni Jose Francisco Rivero III, nga nagpasalamat usab sa pagsalig ug suporta nga gihatag sa ilang estasyon.
Matud pa sa lokal nga panggamhanan, ang bag-ong 4×4 patrol car dili lamang usa ka dugang nga kagamitan kondili simbolo sa lig-on nga panagtambayayong tali sa LGU ug PNP.(IKEN B. GULLEM)
Source: Local Government Unit of Sindangan