Wala nay kinabuhi dihang nakaplagan ang usa ka lalaki, nga giingong wala na nakauli didto sa may Sitio San Martin Barangay Don Jose Aguirre sakop sa lungsod sa Manukan, Zamboanga del Norte, kaniadtung Mayo 2 ning tuiga.
Ang live in partner sa biktima nga si Arcelita Sabejon Sampapon, 48 anyos, diin maoy nitaho sa buhatan sa Manukan MPS pinaagi sa hotline number nga napalgang patay sa bukirang dapit sa nahisgutang lugar ang biktima nga giilang si Loreto Casagan Onde.
Dihadiha 4 ka mga personahe sa PNP gikan sa Manukan MPS pinangulohan ni PMAJ Benjamin C. Napigkit – COP uban ni PSSG Jerson Catipay Retes- duty investigator PSSG Junryl Daniel Catipay ug PCPL Adamson Remollo Trinidad mi adto sa nahisgutang dapit aron sa pagpahigayon og imbestigasyon sa naasoy’ng taho.
Sa inisyal nga imbestigasyon nasayran nga ang biktima napakyas sa pagpauli niadtong Mayo 1 hinungdan nga nakahukom ang iyang live in partner nga pangitaon kini diin mga alas 8:02 sa gabii niadtong Mayo 2 iyang nadiskubrehan ang patay’ng lawas sa iyang live in partner nga nagbuy-od sa gamayng luna sa utanan sa dalan nga may dalang basiyo nga botelya sa ilimnong makahubog.
Ang nahimutangan niini dili kasagarang agi-anan hinungdan nga wala dayon makit-e ang patay’ng lawas sa biktima, sanglit layo ang lugar sa ilang silingan, gibana-bana kini nga 2 ka kilometros gikan sa balay sa biktima.
Subay niini, ang biktima nabaniog nga usa ka manginumay apan wala kini sukad pa malambigit sa bisan unsang kasamok sa nahisgutang lugar.
Sa pagsusi ni Dr. Renier Alonzo nasayran nga nanghubag na ang patay nga lawas ug nagsugod na sa pagkadugta, gibana-bana nga kapin sa 48 ka oras nang patay.
Ang findings sa attending physician sa maong kamatayon mao ang pagkonsiderar sa hypertension ug heatstroke, walay timailhan sa pakiglambigit sa kasamok ug walay foul play nga nadiskobrehan.
Sa pagkakaron ang patay’ng lawas sa biktima anaa na sa mga kamot sa nagbangutan nga pamilya.
(Elvie S. Indag – DXKD OJT)