Gidayeg ang usa ka good samaritan nga usa usab ka motorcab driver nga si Ranel Sagayan Raliao, 31 anyos, residente sa Purok Sidlakan, Barangay Turno, Dipolog City, human mipakita og pagkamatinud-anon pinaagi sa iyang pagbalik og 10,000 cash nga iyang nakit-an sa General Luna Street, atubangan sa Bulwagan ng Katarungan.
Nakit-an ang kuwarta samtang nagmaneho siya sa iyang motorcab nga may plate number J90S7D. Imbis nga hipuson, iyang gidala dayon ang kuwarta sa otoridad aron matultolan ang tinuod nga tag-iya niini.
Niadtong hapon sa Enero 26, 2026, opisyal nga naturn-over ang 10,000 pesos kang Maria Rose Alonzo, residente sa Lawaan, Barangay Banonong, Dapitan City, didto sa Traffic Management Office sa City Hall, Dipolog City, atubangan sa Traffic Director Designate nga si Felipe T. Mangila Jr.(JENIFFER JR. DELICA)