Gipahibalo sa Schools Division Office sa Lapu-Lapu City nga walay face-to-face classes karong Enero 28, 2026, subay sa Division Memorandum No. 75 ug 78. Kini nga lakang kabahin sa pagpangandam sa siyudad isip host sa ASEAN Tourism Forum 2026.
Ang suspensyon sa klase gituyo aron mamenosan ang trapik ug masiguro ang hapsay ug luwas nga paglihok sa mga ASEAN dignitaries nga moabot ug molihok sulod sa Lapu-Lapu City atol sa maong kalihokan.
Ang walay face-to-face classes mag-aplikar sa tanang public ug private schools sa mainland sa Lapu-Lapu City, gawas lang sa mga eskwelahan sa Olango District. Sa maong adlaw, ang mga klase ipahigayon pinaagi sa Alternative Delivery Modes (ADM).
Bisan pa sa suspensyon sa face-to-face classes, gikinahanglan gihapon nga mosulod ang mga magtutudlo sa ilang tagsa-tagsa ka eskwelahan. Pwede silang maghimo og monitoring, miting, Learning Action Cell (LAC) sessions, ug uban pang kalihokan nga may kalabotan sa eskwelahan.
Mipasalamatan ang pamunuan sa edukasyon sa kooperasyon ug pagsabot sa mga ginikanan, estudyante, ug magtutudlo, samtang ang siyudad naningkamot nga mahimong malampuson ug hapsay ang pag-host sa ASEAN Tourism Forum 2026.
Source: LGU Lapu-Lapu City
I via Renante Socia Lada