Unang higayon nga mipahibalo si Mayor Dr. Ruth M. Brillantes sa kahimtang sa lokal nga pangagamhanan ug sa direksyon nga iyang gipasunod sa Salug atol sa iyang unang State of the Municipality Address (SOMA) niadtong Setyembre 12, 2026.
Atol sa SOMA nga gipahigayon sa Salug Municipal Gymnasium, iyang gitaho ang mga nahimo sa munisipyo gikan Hulyo hangtod Disyembre 2025, lakip ang paggamit sa pondo, mga nahuman nga proyekto ug mga programa nga gipadayon sa lokal nga pangagamhanan.
Gipresentar ni Brillantes nga adunay ₱227.86 milyon nga available budget ang Salug ubos sa FY 2025 budget ug supplemental appropriations, diin ₱182.84 milyon ang gigamit alang sa lima ka sektor.
Apil sa iyang gipasiugda ang mga proyekto sa imprastraktura nga iyang gipresentar isip kabahin sa pagpalig-on sa mga pasilidad ug serbisyo sa lungsod.
Tulo ka dagkong proyekto ang nahuman sa ikaduhang bahin sa 2025 nga adunay kinatibuk-ang kantidad nga ₱15.27 milyon. Lakip niini ang pagpaayo sa Salug Gymnasium, Liguac PAMANA Building ug comfort room, ug Phase III sa Multi-Purpose Building.
Gipakita usab sa SOMA ang padayon nga infrastructure program sa 2026, diin ₱70.45 milyon ang gitagana alang sa infrastructure, environmental management, resilience ug emergency response.
Sumala sa Municipal Engineering Office, walo ka proyekto ang nahuman ug lima ang ongoing, nga mokabat sa ₱48.88 milyon. Lakip sa mga proyekto ang concreting sa Marcos Street ug P. Garcia Street, pagpaayo sa Integrated Bus Terminal Lounge, ug mga pasilidad sa mga eskwelahan ug komunidad.
Apan ang report sa unang SOMA dili lamang nagtutok sa imprastraktura. Gipakita usab niini ang paggamit sa pondo sa nagkalain-laing sektor ug ang mga programa nga gipatuman sa lokal nga pangagamhanan isip tubag sa mga panginahanglan sa mga residente.
Giila ni Mayor Brillantes nga importante ang suporta sa national ug provincial government, ingon man sa congressional office, aron mapadayon ang mga programa ug proyekto sa lungsod.
Gipasalamatan niya si Governor Darel Dexter T. Uy ug 3rd District Representative Michael Adrian Amatong tungod sa ilang tabang ug suporta sa mga proyekto sa Salug.
Gipahigayon ang unang SOMA ni Brillantes isip kabahin sa 67th Founding Anniversary sa Salug, nga nahimong higayon alang sa administrasyon sa paghatag og account sa unang mga bulan sa pagdumala ug paglatid sa mga prayoridad sa lungsod padulong sa sunod nga mga tuig.
Sa unang SOMA, gipakita sa administrasyon ni Brillantes nga ang pagdumala sa Salug dili lamang masukod sa kantidad sa pondo nga gigasto, kondili sa mga programa, serbisyo ug proyekto nga gipatuman niini ug sa direksyong gusto niini nga dalhon ang lungsod.(IKEN B. GULLEM)
Source: Zamboanga del Norte Provincial News Network