Human sa sunod-sunod nga pagpangandam ug koordinasyon sa mga ahensya sa gobyerno, ipahigayon karong adlawa, Septiyembre 14, 2026, sa Zamboanga del Norte Cultural and Sports Center (ZNCSC) ug sa palibot niini ang ‘Handog ng Pangulo Serbisyong Sapat Para sa Lahat.’
Ang kalihokan giandam sa Provincial Government of Zamboanga del Norte ubos sa pagpangulo ni Governor Darel Dexter T. Uy, sa koordinasyon sa Presidential Management Staff (PMS), aron mapaduol sa katawhan ang nagkalain-laing programa ug serbisyo sa gobyerno.
Niadtong mga miaging adlaw, gipahigayon ang koordinasyon sa mga ahensya nga gipangulohan ni OIC Provincial Administrator Charmie A. Yu ug Executive Assistant IV Ernie Rojo, uban si PMS Western Mindanao Field Unit Team Leader Asnawi Maamor, aron maandam ang mga serbisyo nga itanyag atol sa kalihokan.
Gikumpirma nga 17 ka ahensya sa gobyerno ang miapil sa kalihokan nga kabahin sa pagsaulog sa adlawng natawhan ni Presidente Ferdinand R. Marcos Jr.
Kabahin sa kalihokan karon ang Jobs Fair sa Department of Labor and Employment (DOLE) alang sa mga nangitag trabaho, samtang ang Department of Social Welfare and Development (DSWD) magpahigayon og off-site payout alang sa pipila ka programa nga ilang gipatuman sa Sindangan.
Ang Department of Agriculture (DA) magdala sa Rice for All Program ug Kadiwa ng Pangulo, diin adunay P20 nga bugas ug nagkalain-laing produkto sa agrikultura. Iapod-apod usab ang mga makinaryang pang-agrikultura.
Ang Department of Agrarian Reform (DAR) motunol og mga makinarya pang-agrikultura, mga titulo sa yuta ug uban pang serbisyo ngadto sa ilang mga benepisyaryong asosasyon.
Ang PhilHealth magpa-rehistro sa mga benepisyaryo sa YAKAP ug motanyag sa uban pang serbisyo, samtang ang Philippine Statistics Authority (PSA) mag-isyu og National IDs sa paper form ug uban pang serbisyo. Aduna usab kiniy off-site activities sa JRMH ug Polanco National High School.
Maghatag usab ang Department of Health (DOH) og basic medical services ug hygiene kits sa pakigtambayayong sa Provincial Health Office (PHO).
Samang magpahigayon ang Department of Trade and Industry (DTI) og Trade Fair ug Diskwento Caravan. Ang OWWA ug Department of Migrant Workers (DMW) motanyag usab og mga serbisyo alang sa mga OFW ug ilang mga pamilya.
Ang Technical Education and Skills Development Authority (TESDA) maghatag og allowances ngadto sa mga benepisyaryong estudyante sa short courses, ug magpahigayon usab og skills assessment ug demonstration. Motanyag usab kini og dugang scholarship opportunities.
Ang Provincial Social Welfare and Development Office (PSWDO) mag-apod-apod og financial assistance ngadto sa mga rehistradong benepisyaryo sa TUPAD ug AICS, lakip ang pag-apod-apod og bugas ubos sa LGSF-FALGU.
Samtang ang Office of the Provincial Agriculturist (OPAG) maghatag og libreng mga binhi ug seedlings.
Gilauman nga pinaagi sa maong kalihokan, mas daghang katawhan sa Zamboanga del Norte ang makabenepisyo sa nagkalain-laing programa ug serbisyo sa gobyerno nga gipaduol direkta ngadto sa komunidad.(IKEN B. GULLEM)
Source: Zamboanga del Norte Provincial News Network