Miapil ang 97th Infantry (Kalasaglahi) Battalion, Philippine Army sa Green Stewardship Launching Program sa Jose Rizal Memorial State University (JRMSU)-Siocon Campus niadtong milabay nga adlaw.
Gipangulohan ni LTC Jessie G. Bergonia INF (GSC) PA, commanding officer sa 97IB, ang delegasyon sa batalyon sa maong kalihokan nga may temang “One Campus, One Commitment to a Greener Future.”
Gitambongan ang kalihokan sa mga representante sa unibersidad, lokal nga pangagamhanan, nagkalain-laing ahensya sa gobyerno, stakeholders, faculty, staff, mga estudyante ug mga miyembro sa komunidad.
Sa iyang mensahe, gipahayag ni LTC Bergonia ang suporta sa 97IB sa programa ug ang ilang paningkamot sa pagpalambo sa pagpanalipod sa kinaiyahan. Iyang gipasiugda nga ang pag-atiman sa palibot responsibilidad sa tanan ug nagkinahanglan og hiniusang paningkamot sa lain-laing sektor.
Gipunting usab niya nga ang programa dili lamang nagtumong sa pagpabiling limpyo ug lunhaw sa campus, kondili usa usab ka paagi sa pagpalig-on sa kooperasyon tali sa mga stakeholder ug pagpalambo sa responsableng partisipasyon sa komunidad.
Gipasalig sa 97IB ang padayon nga suporta sa mga inisyatiba alang sa environmental protection, community participation, sustainable development ug peacebuilding.
Natapos ang kalihokan pinaagi sa panaghiusa sa mga partisipante sa pagpadayon sa mga lakang alang sa mas lunhaw ug malungtarong komunidad alang sa umaabot nga henerasyon.(IKEN B. GULLEM)
Source: 97th Infantry “Kalasaglahi” Batallion