Aron palig-onon ang panag-partner sa Philippine National Police (PNP) ug mga institusyon sa edukasyon, gipangunahan sa City Anti-Drug (CAD) ug Women and Children Protection Desk (WCPD) nga mga personahe sa Dipolog City Police Station ang Ugnayan sa Paaralan/Kabataan nga programa, pinaagi sa awareness lecture alang sa mga estudyante sa Tubod Integrated School sa Covered Court sa maong eskwelahan sa Barangay Galas, Dipolog City.
Gipangulohan ang kalihokan ni PEMS Eric U. Ochotorena, CESPO, kauban ang mga Saint Vincent College Inc. Criminology interns, ug sa suod nga koordinasyon ni Mrs. Maria Teresita Ronolo, prinsipal sa Tubod Integrated School.
Tumong sa kalihokan ang paghatag kahibalo sa kabatan-onan aron malikayan ang ilang pagkahimong biktima sa abuso ug kriminalidad.
Gipasiugda usab sa programa ang aktibong partisipasyon sa kabatan-onan isip mga kauban sa PNP sa pakigbatok sa ilegal nga droga, terorismo, ug uban pang hulga sa kalinaw ug kahusay sa komunidad. Pinaagi niini, gilauman nga mahimong responsableng lider ug bantay sa kaluwasan ang mga estudyante sa ilang eskwelahan ug barangay.(IKEN B. GULLEM)
Source: Dipolog City Police Station