Nagpahigayon og solemne nga Flag Retreat ang City Government of Dapitan kaniadtong hapon sa City Government Center isip pagtimaan sa panaghiusa ug pagpamalandong, subay sa pagsaulog sa Muslim holiday, Enero 16, 2026.
Nagtigom ang mga kawani ug opisyal sa kagamhanan sa malinawon nga kahimtangan samtang matinahuron nga gipaubos ang bandila sa Pilipinas. Ang kalihokan nagsimbolo sa hiniusang pagkamakabayan ug pagrespeto sa lain-laing pagtuo ug tradisyon sa mga Dapitanon.
Gipakita sa maong seremonya ang padayon nga paningkamot sa lokal nga kagamhanan sa pagpalig-on sa kalinaw, inklusibidad, ug panaghiusa sa komunidad.
Samtang nag-andam ang Muslim nga komunidad alang sa pag-obserbar sa Isra Wal Mi’raj o The Night Journey, giila sa City Government of Dapitan ang kahinungdanon sa maong sagrado nga okasyon ug gipamatud-an ang suporta niini sa malinawon nga pagpakig-uban ug pagrespeto sa relihiyosong kalain-lain sa siyudad.(IKEN B. GULLEM)
Source: City Government of Dapitan