Nasaksihan sa komunidad sa Brgy. Dilawa ang usa ka mahinungdanong lakang alang sa kalamboan human opisyal nga giturn-over ang barangay road concreting padulong sa Dilawa Elementary School ug gilunsad ang pagbendisyon sa bag-ong Multi-Purpose Building sa maong barangay, kaniadtong Enero 20, 2026.
Ang bag-ong konkretong dalan gilauman nga makapahapsay sa pagbiyahe sa mga estudyante, ginikanan, ug residente, ilabi na sa mga panahon nga daotan ang kahimtangan sa dalan.
Samtang ang multi-purpose building, nga gitawag nga simbolo sa panaghiusa sa komunidad, andam nga gamiton alang sa mga kalihokan sa barangay, miting, ug lain-laing programa nga makatabang sa katawhan.
Mitambong sa maong kalihokan si Congressman Roberto “Pinpin” Uy Jr., nga giila sa lokal nga pangulohan ug mga residente alang sa iyang suporta ug paghatag og panahon sa pagbisita sa barangay.
Gisuportahan usab ang kalihokan sa mga lider sa LGU Piñan, lakip na si Vice Mayor Benedicto C. Cainta II, ug mga miyembro sa Sangguniang Bayan nga sila Hon. Ronald Dancalan ug Hon. Roland Icao, nga padayon nga nagpakita og paningkamot alang sa kalamboan sa lungsod.
Alang sa mga residente sa Barangay Dilawa, ang mga proyekto dili lamang pisikal nga estruktura kundili mga timaan sa paglaum, mga panalangin nga magpadayon sa pagserbisyo ug pag-uswag sa kinabuhi sa komunidad sa umaabot.(IKEN B. GULLEM)
Source: Mayor Rommel Gudmalin