Nakadawat ang 880 ka mga disadvantaged ug displaced workers sa lain-laing lungsod sa Zamboanga del Norte og pay-out ubos sa Tulong Panghanapbuhay sa Ating Disadvantaged/Displaced Workers (TUPAD) program sa Department of Labor and Employment (DOLE) kaniadtong Enero 20, isip bahin sa Emergency Employment Program sa gobyerno.
Gipahigayon kini sa Zamboanga del Norte Convention and Sports Center alas 9:00 sa buntag, uban sa tabang ug koordinasyon sa Provincial Government pinaagi sa Public Employment Service Office (PESO), nga nagsilbing implementing arm sa DOLE sa probinsya.
Matag benepisyaryo nakadawat og ₱414 kada adlaw sulod sa napulo ka adlaw nga trabaho, nga gituyo sa DOLE aron makatabang sa pagtabon sa pangunang panginahanglanon sa mga pamilyang naapektuhan sa kawad-on sa trabaho ug kalisod sa ekonomiya.
Sumala kang PESO Manager ug Acting Provincial Administrator Charmie A. Yu, dako ang tabang sa programa sa paghatag og temporaryong panginabuhian sa katawhan, ilabi na sa mga sektor nga walay regular nga kita. Iyang gipasalamatan ang DOLE sa padayon nga suporta sa probinsya.
Sa mensahe usab ni Gobernador Darel Dexter T. Uy nga gipaabot ni 2nd District Board Member Michael “Jojo” M. Documento, iyang gihatagan og gibug-aton nga ang TUPAD dili lamang pinansyal nga ayuda, kondili usa ka programa nga naghatag og dignidad pinaagi sa matinud-anong trabaho alang sa mga nanginahanglan.
Samtang nagpadayon ang pay-out, nagpahigayon usab ang PhilHealth pinaagi sa YAKAP (Yaman sa Kalusugan Program) og libreng serbisyong medikal, lakip ang konsultasyon, diagnostic tests, annual physical examination, ECG ug libreng tambal. Matod pa ni Social Insurance Officer III Geoffrey Talpis, libre ang tanang serbisyo ubos sa YAKAP ug gidasig ang publiko nga magparehistro sa PhilHealth sa ilang pinakaduol nga health center aron makabenepisyo sa programa.(IKEN B. GULLEM)
Source: Zamboanga del Norte Provincial News Network