Nagmalampuson ang gipahigayon nga “Tulong Panghanapbuhay Para sa Ating Disadvantaged/Displaced Workers kon TUPAD Orientation” alang sa mga benepisyaryo sa nasangpit nga programa dinhi sa dakbayan kaganihang buntag, Nobyembre 03 ning tuiga didto sa ZN Convention and Sports Center nga nagsugod sa may alas-11:00 ang takna. Ang maong kalihokan ang gipangunahan sa Department of Labor and Employment kon DOLE Region IX inubanan sa Kagamhanang Lokal ning dakbayan ug 2nd Congressional District ni Cong. Glona Labadlabad.
Ang maong kalihokan ang gitambongan ni City Mayor Darel Dexter T. Uy, kinsa mipabati sa iyang mensahe sa pagpasalamat ngadto sa DOLE Region 9 alang sa ilang gihatag nga ayuda pinaagi sa programang TUPAD, isip makatabang sa mga apektadong trabahante sa COVID-19 pandemya.
Lakip usab sa mitambong ug mihatag sa ilang mensahe sila si Chief Labor Employment Officer/Field Office Head, Ms. Lourdes B. Amores, 2nd Congressional District Representative, Cong. Glona Labadlabad, PESO Manager ning dakbayan, Mr. Carlo P. Deloria ug CIBAC Partylist Coordinator, Mr. Michael U. Venegas, isip representante ni Senator Joel Villanueva.
Nasayran nga mikabat ngadto sa otsosientos singkwenta’y kwatro (854) ka mga benepisyaryo ang makapahimulos sa maong programa. Tumong niini ang mahatagan ug panginabuhian ang mga katawhan nga na-apektohan ang panarbaho tungod sa COVID-19.
(Source: City Information Office | Dipolog City Government Facebook page)