Gipahigayon sa dakbayan sa Dapitan ang Tulo ka oras nga Face to Face Cyber Hygiene Training, pinaagi sa focal person Susan Q. Empeynado sa City Economic Enterprise Office, nga maoy nag-host sa nasangpit nga Training, ug kini matud pa gi-implementar sa Philippine Chamber of Commerce and Industry Human Resources Development Foundation Inc. (PCCI-HRDF), didto sa 2nd Floor sa Amphitheater sa City Government Center, nakalabay’ng adlaw, Setyembre 15, 2025.
Matud pa nga ang naasoy nga Training, gipahigayon aron tugyanan og dugang kaalam ang mga partisipante niini, alang sa pagmintenar sa kahibalo kabahin sa Online Security, diin ang mga topiko niini, naglakip sa pagsabot sa cyber hygiene, pagpahigayon sa mga batakang praktis sa seguridad, pagpanalipod sa datos ug mga devices, pag-ila sa mga online scams, ug paggamit sa mga mekanismo sa pagreport.
Ang kalihokan nagdani sa pag-apil gikan sa gipili nga mga empleyado sa Local Government Unit (LGU) ug mga interesado nga negosyante gikan sa sektor sa Micro, Small, and Medium Enterprise (MSME), nga tanan nangita sa pagpauswag sa ilang mga kahanas sa cyber security.
Nasayran nga ang mga mitambong sa nahisgutang Training, nakakuha og praktikal nga kahibalo ug mga estratehiya , alang sa pakiglambigit sa digital nga kalibutan. Ang pagbansay naghatag og komprehensibong panglantaw sa kasamtangang mga hulga sa cyber ug epektibong mga pagpangandam, nga naghatag og kaalam sa mga partisipante aron mapanalipdan ang ilang mga kaugalingon ug ang ilang mga organisasyon gikan sa mga posibleng cyber-attact.
Ang naasoy nga sesyon naglakip sa praktikal nga hacking ug mga teknik sa paglikay nga nagtumong sa pagpalambo sa usa ka mas luwas nga online nga komunidad, nga nagpunting sa kamahinungdanon sa seguridad isip usa ka kinaadman.
Tungod sa maong programa, nagpasalamat ang mga mipartesipar sa nasangpit nga training, ngadto sa ilang Mayor, nga si Mayor Evelyn T. Uy, tungod sa iyang mga pagpaningkamot, nga matugyanan sila og dugang kaalam, nga ilang magamit sa ilang mga pagkinabuhi, ug malikayan ang pasebling pagkabiktima sa Online-Scam.(Julius Esmade)
Source: CITY GOVERNMENT OF DAPITAN