DIPOLOG CITY — Tulo (3) ka lalaki nga giila isip High Value Individuals (HVI) ang nasikop sa operasyon sa Dipolog City Police Station nga nagpatuman sa Search Warrant No. EJ-SW-07-26 tungod sa paglapas sa Republic Act 9165 o Comprehensive Dangerous Drugs Act of 2002.
Ang search warrant nga gi-isyu niadtong Pebrero 18, 2026 sa RTC Branch 6, Dipolog City, gipahigayon alas 8:45 sa gabii niadtong Pebrero 20, 2026, sa koordinasyon sa PDEA Zamboanga del Norte Provincial Office (Lead Unit), RDEU 9, ug 1st ZNPMFC.
Nasikop ang mga suspek nga pawang residente sa Purok Kamonggay, Barangay Galas, Dipolog City — usa ka 31 anyos nga porter, 36 anyos nga driver, ug 30 anyos nga construction worker — ug nadiskubrehan usab ang usa ka drug den nga dayong gibungkag sa mga operatiba.
Narekober sa operasyon ang 15 ka dagkong heat-sealed plastic sachets nga adunay gituohang shabu nga may gibug-aton nga mokabat sa 14 gramos ug gibanabana nga kantidad nga Php 95,200.00. Nakuha usab ang lain-laing drug paraphernalia lakip ang aluminum foil, disposable lighters, usa ka red pouch, usa ka Realme nga cellphone, ug usa ka brown nga sudlanan.
Ang mga nadakpan anaa karon sa kustodiya sa Dipolog City Police Station alang sa hustong disposisyon, samtang ang nakumpiskar nga droga ug ubang ebidensya giturn-over sa PDEA ug sa Provincial Forensic Unit alang sa laboratory examination.(JENIFFER JR. DELICA)
Source: Dipolog City Police Station, ZNPPO