MANUKAN, Zamboanga del Norte — Gi-aresto sa kapulisan ang usa ka magtutudlo human gireklamo sa usa ka 15 anyos nga babayeng estudyante tungod sa gi alegar nga pagpanghalok ug dili angay nga paghikap sulod mismo sa classroom sa usa ka eskwelahan sa Brgy. Poblacion.
Sumala sa inisyal nga report sa Manukan Municipal Police Station, ang biktima mipahibalo sa mga otoridad nga niadtong Pebrero 18, 2026, gipasulod siya sa classroom sa magtutudlo nga gitawag sa alyas “Kaloy,” diin gi alegar nga gisirhan ang pultahan ug gipugos siya og halok ug gihikap sa lain-laing parte sa lawas nga walay iyang pagtugot.
Human sa insidente, daling mitaho ang biktima sa kapulisan nga miresulta sa agarang pagdakop sa gipasanginlang suspek.
Atubangon sa maong magtutudlo ang kasong Acts of Lasciviousness in relation to RA 7610. Sa pagkakaron, padayon ang imbestigasyon aron makuha ang tanang detalye ug masuta ang kamatuoran sa nahitabo.
Gipahinumduman sa kapulisan nga ang gireklamo giisip pang inosente hangtod mapamatud-an ang sala sa korte.(JENIFFER JR. DELICA)
Source: Zanorte News Flash