Giturn-over sa Department of Information and Communications Technology (DICT) ang tulo ka CLICK laptops ngadto sa Aliguay Integrated School aron magamit sa mga magtutudlo ug estudyante sa ilang digital learning needs.
Gipahigayon ang turnover ceremony niadtong Hulyo 22, 2026 sa SP Session Hall sa Dapitan City, diin gitambongan sa mga opisyal sa DICT, City Government of Dapitan ug Department of Education (DepEd).
Gitumong ang mga laptop nga masangkapan ang Aliguay Integrated School og dugang digital resources, ilabina isip usa ka last-mile school nga nahimutang sa hilit nga Aliguay Island.
Kabahin sa maong turnover ang panagtambayayong sa DICT, City Government of Dapitan ubos sa pagpanguna ni Mayor Evelyn T. Uy, ug DepEd aron mapalapad ang access sa teknolohiya ug digital learning opportunities alang sa mga magtutudlo ug estudyante sa remote nga mga komunidad.
Mitambong sa seremonyas sila DICT Assistant Secretary June Vincent Manuel Gaudan, Regional Director Cheryl C. Ortega ug Schools Division Superintendent Dr. Jay S. Montealto, CESO V, uban sa mga representante sa lokal nga kagamhanan ug eskwelahan.
Gipasalamatan usab sa mga opisyal sa eskwelahan ang maong suporta ug mipasalig nga hapsay nga ampingan ug gamiton sa hustong paagi ang mga laptop aron mapuslan sa mga estudyante ug magtutudlo sa Aliguay Integrated School.
Kini nga turnover nagpakita sa padayong suporta sa mga ahensya sa gobyerno sa paghatag og digital tools ngadto sa mga eskwelahan aron mas mapalapad ang access sa teknolohiya ug edukasyon.(IKEN B. GULLEM)
Source: DepEd Tayo-Division of Dapitan City