Giawhag ang mga Information Officers sa Zamboanga del Norte nga mas palig-onon ang ilang papel isip unang depensa sa publiko batok sa misinformation, disinformation ug uban pang information disorders.
Gipasiugda kini atol sa 3rd Quarter Meeting of Information Officers sa Zamboanga del Norte nga gipahigayon niadtong Hulyo 22, 2026 sa Hall 3, Provincial Capitol, diin gitutokan ang kamahinungdanon sa hustong pag-verify sa impormasyon sa dili pa kini ipakatap ngadto sa publiko.
Mipahinumdom si Jocelyn P. Alvarez, OIC-Regional Head sa Philippine Information Agency (PIA) Regional Office IX, nga ang mga Information Officers dili lamang tigmugna og content alang sa social media, kondili mga tigbantay usab sa pagsalig sa publiko.
Matud pa niya, mas dako ang responsibilidad sa mga government communicators samtang paspas nga nag-uswag ang teknolohiya ug Artificial Intelligence (AI), nga nagkinahanglan kanila nga kanunay magkat-on ug mopahiangay sa bag-ong pamaagi sa komunikasyon.
Gipasabot usab ni Clennkei C. Peñalosa, Government Information Center Coordinator sa PIA Zamboanga del Norte, ang kalainan sa misinformation, disinformation ug malinformation, lakip ang mga paagi sa pag-ila ug pag-atubang niini.
Iyang gipasiugda nga dili tanang impormasyon nga gitawag og “fake news” hingpit nga bakak, tungod kay adunay mga content nga nagsagol og tinuod ug bakak nga impormasyon aron makalibog o makapahisalaag sa publiko.
Tungod niini, giawhag ang mga Information Officers nga magmatngon sa matag impormasyon nga ilang madawat, susihon ang tinubdan ug i-verify ang mga detalye sa dili pa kini ipaabot sa publiko.
Kini gidumala sa Provincial Information Center (PIC), ubos sa pagpanguna ni Executive Assistant IV Rosemarie P. Miranda, OIC-Provincial Information Center, ang maong kalihokan nga adunay tema nga “Media and Information Literacy for Gender-Responsive Public Communication.”(IKEN B. GULLEM)
Source: Zamboanga del Norte Provincial News Network