Gipahugtan sa Municipal Disaster Risk Reduction and Management Office o MDRRMO sa Leon B. Postigo ang ilang kapasidad sa pagresponde sa emerhensiya human pormal nga gipahinungod ang tulo ka bag-ong rescue vehicles niadtong Septiyembre 28,2026 nga gamiton sa operasyon sa pagluwas ug pagtabang sa mga residente.
Ang mga sakyanan gituyo aron mas dali nga makasulod sa mga interior nga barangay, pig-ot nga dalan ug mga lugar nga lisod maagian sa dagkong emergency vehicles.
Pinaagi niini, gilauman nga mas mapadali ang pag-abot sa mga responder ngadto sa mga biktima ilabina sa panahon sa aksidente, pagbaha ug uban pang kalit nga insidente.
Gipasiugda sa MDRRMO nga importante ang tukmang rescue equipment ug sakyanan sa panahon sa kalamidad tungod kay matag segundo mahimong kritikal sa pagluwas sa kinabuhi.
Ang bag-ong mga unit makatabang sa responders sa paglikay sa mga bottleneck sa dalan ug paghatod dayon sa gikinahanglang rescue ug first-aid assistance.
Mitambong sa maong kalihokan alang sa administrasyon ni Mayor Runie “BobbyJam” O. Jamora si MDRRMO Chief Marilou R. Gimang, uban sa mga empleyado sa lokal nga kagamhanan.
Gilauman nga pinaagi sa dugang nga rescue assets, mapalig-on pa ang disaster preparedness ug emergency response sa lungsod, ilabina sa mga komunidad nga layo o lisod maabot sa panahon sa krisis.(MEDALYN U. BORJA)
Source: Municipal Government of Leon B. Postigo