Naka mugna og lapad nga Landslide ang nasinatian nga Tropical Depression ning atong Probinsiya, particular ang dakbayan sa Dapitan, diin kini nahitabo didto sa Sitio Lipata, sa Brgy. Taguilon, Dapitan City, nakalabay na adlaw, Agusto 19, 2025, sa may alas 7:45 ang takna sa buntag.
Matud pa sa mga naka saksi sa nasangpit nga Landslide, pinaagi nila ni Rogie Balladares ug ni Ging Ging Cruda, diin ang mga panimalay sa maong mga indibidwal, duol gyud mismo sa lugar nga nahitabo ang maong Landslide, nga tungod matud pa sa walay hunong nga pagbunok sa ulan, nga sukad pa gabie, hangtod na sa pagkabuntag na, mibumok ang maong buntod nga bahin ug nahunlak kini, padulong sa ubos nga bahin duol gyud mismo sa ilang pinuy-anan.
Hinuon, nagpasalamat ang mga residente nga duol sa lugar nga nagka Landslide, tungod kay walay unsa mang mga kadaot sa ilang mga mehoras ang naapiktuhan niini, gawas lamang sa mga punoan sa lubi, nga maoy nangatumba og nadala sa pagka landslide.
Tungod niining panghitabo, ginaawhagan sa City Dissaster Risk Reduction and Management Office, ang mga katawhan, nga kon ugaling makasinati og maot nga panahon ang bisan asang lugar, magpabilin nga magbinantayon, og magmonitor sa palibot, aron malikayan ang posibling kadaot nga mabuhat tungod sa kalamidad.
Dugang niini, nga ugaling adunay matang sa mga emerhinsiya sa inyong lugar, itawag lamang ninyo sa ilang Hotline Number, aron ila dayon kining marespondihan.(Julius Esmade)