Gihakot sa Tribu Pabibo sa Leon B. Postigo, Zamboanga del Norte ang Major ug Minor Prizes sa gipahigayong Invitational Kinabayo Festival 2024 Street Dancing and Final Showdown Competition, atol sa pagsa-ulog sa adlaw sa Patron sa Dapitan- Senyor Santiago, Hulyo 25 niining tuig, sa JRMSU Ground, Dapitan City.
Ang Tribu Pabibo nakadawat sa kinatibuk-ang premyo balor 270,000 pesos ug tropeyo. Kinsa nahimong Kampeon sa Street Dancing and Final Showdown, nga adunay premyo 200,000 pesos; Best in Street Dancing-50,000 pesos ug Best in Musicality-20,000 pesos.
Gisundan kini sa Tribu ni Rizal, sa Barangay Talisay, Dapitan City, kinsa nakadawat sa kinatibuk-ang premyo balor 190,000 pesos plus trophy, kinsa nahimong 1st runner-up sa Street Dancing ug Showdown Competition, adunay premyo 150,000 pesos; Best in Costume-20,000 pesos ug Best in Santiago Mascot-20,000 pesos.
Samtang ang Tribu Mananayaw, sa Polanco, Zamboanga del Norte, maoy nahimong 2nd Runner-up, nakadawat sa cash prize balor 100,000 pesos ug tropeyo.
Sa laing bahin, ang Tribu ni San Pedro, sa Barangay San Pedro, Dapitan City maoy nahimong Best in Choreography, nakadawat sa cash prize balor 20,000 pesos, plus consolation prize 70,000 pesos.
Samtang nakadawat sa tag 70,000 pesos ang mga non-winners nga mao ang Contingent No. 1, sa Dapitan City National High School; Contingent No. 6, Tribu Bagtinganon, sa Barangay Bagting, Dapitan City.
Kahibaloan adunay unom (6) ka mga contingents ang nagpakita ug gilas sa street dancing ug sa final showdown diin ang criteria for judging-30% niini sa Street Dancing ug 70% sa final Showdown, nga mosumada sa 100 porsyento.
Niini, malipayong nagpasalamat si Leon B. Postigo Mayor Runie “Bobby” Jamora, sa kahitas-an, tungod kay sa ikaduhang higayon nahimo’ng Kampeon ang Tribu Pabibo sa Kinabayo Festival Street Dancing and Showdown Competition sa Dapitan tuig 2023 ug karon 2024.
Iyang subling gipasalamatan si Governor Nanay Nene Jalosjos ug Provincial Administrator Wilberth “GawJojo” Magallanes sa dakong suporta ug sa LGU-Dapitan sa pagpangulo ni Mayor Bullet Jalosjos.
Dugang pasalamat ni Mayor Jamora, ngadto sa mga ginikanan nga ming-uyon sa pagpa-apil sa ilang mga anak sa Tribu Pabibo, nga subli kining nahimong Kampeon. Viva Senyor Santiago! (Angelica T. Obina)
(Source: PIC-Nena M. Garcia)