Nagpagawas og traffic advisory ang City Government of Dapitan alang sa ipatuman nga rerouting ug temporaryong pagsira sa pipila ka kadalanan karong Hulyo 24 aron masiguro ang hapsay ug luwas nga selebrasyon sa Kinabayo Festival 2026.
Sugod alas 10:00 sa buntag hangtod alas 1:00 sa hapon, ipatuman ang detour sa mga sakyanang padulong sa Bagting pinaagi sa rota nga Pagbuaya, Guading, ug Boulevard. Magpabiling abli ang Boulevard alang sa mga sakyanang gikan sa Bagting padulong sa Dipolog.
Sa alas 12:00 sa udto, sirad-an sulod sa 45 minutos ang City Hall Drive, Fr. Sanchez Street, bahin sa Leonor Rivera Street, bahin sa Justice Saguin Street, ug ang Don Carnicero Street padulong Dr. Heinz Luetke Street aron hatagan og dalan ang Sinug ug LOA.
Alas 4:00 sa hapon usab magsugod ang Grand Fiesta Procession diin ipatuman ang rerouting sa mga sakyanan tali sa Bagting, Lawaan, Highway, ug Boulevard. Gihangyo sa City Government of Dapitan ang mga motorista nga magplano daan sa ilang biyahe, mosunod sa gihaing alternatibong rota, ug makigtambayayong sa mga traffic personnel aron malikayan ang pagsamok sa dalan atol sa kasaulogan.(JENIFFER JR. DELICA)
Source: Dapitan City Government