Mibisita sa Local Government Unit sa Rizal, Zamboanga del Norte ang mga representante sa National Fisheries Research and Development Institute o NFRDI aron ipresentar ang FISHCORE Project nga nagtumong sa pagpalig-on sa panginabuhian sa mga komunidad sa baybayon.
Gihisgutan sa panagkita kang Mayor Marissa Manigsaca ang proyektong “Strengthening Coastal Livelihood through Modified Bamboo Raft Technology for Oyster Culture” nga nagtan-aw sa paggamit og mas episyente ug malungtarong pamaagi sa pag-alima sa talaba gamit ang modified bamboo raft technology.
Sumala sa NFRDI, gitumong sa proyekto nga mapalambo ang produksyon sa talaba ug makahimo og dugang nga oportunidad sa panginabuhian alang sa mga lokal nga mangingisda ug ilang pamilya.
Gipadayag ni Mayor Manigsaca ang suporta sa LGU Rizal sa mga inisyatiba nga nagpalambo sa malungtarong pangisda ug naghatag og dugang nga kita sa mga komunidad sa kabaybayonan pinaagi sa panagtinabangay sa NFRDI, Bureau of Fisheries and Aquatic Resources, ug mga lokal nga mangingisda.(JENIFFER JR. DELICA)
Source: Municipality of Rizal