Balhog karon sa prisohan homan masikop atol sa gipatoman nga hiniusang operasyon sa mga personahe sa kapulisan ang Top 9 Most Wanted (Provincial level) mga alas 2:30 sa hapon niadtong Mayo 11, 2026, didto sa Brgy. New Salvacion, Gutalac, Zamboanga del Norte.
Naila ang dinakpan nga wanted person nga si alyas “Toto” 53 anyos, lalaki, ulitawo ,adunay live-in partner, mag-uuma, illiterate, ug residente sa Purok 6, Brgy. San Isidro, Gutalac, Zamboanga del Norte.
Gidakop pinaagi sa mga personahe sa Gutalac Municipal Police Station, Labason Municipal Police Station, ug sa 2nd Zamboanga del Norte Provincial Mobile Force Company sa bisa sa warrant of arrest alang sa kasong Murder nga gi-isyu sa Regional Trial Court, Ninth Judicial Region, Branch 28 , Liloy Zamboanga del Norte, gipetsahan ug Desyimbere 10,2025 nga walay piyansa nga girekomendar.
Ang suspek kasamtangang gikustodiya karon sa Gutalac Municipal Police Station alang sa hustong disposisyon ug dokumentasyon.(MEDALYN U. BORJA)
Source: ZNPPO