Arestado ang usa ka Top 8 Most Wanted Person nga nag atubang sa kasong Acts of Lasciviousness,atol sa gihimo nga joint operation sa mga personahe sa Tracker Team sa Polanco Municipal Police Station, uban sa 3rd Platoon sa 1st Zamboanga del Norte Provincial Mobile Company, mga 4:15 ang takna sa kahapunon niadtong Nobyembre 10,2025 ,didto sa Sitio Red Land, Brgy. Anastacio, Polanco, Zamboanga del Norte.
Naila ang dinakpan nga si alyas “Cardo” 29 anyos, lalaki, ulitawo, adunay live-in partner,mag-uuma, ug residente sa Purok Sampaguita, Brgy. Bandera, Polanco, Zamboanga del Norte,kinsa gidakop tungod sa lima ka ihap sa kasong paglapas sa Acts of Lasciviousness kalabot sa Section 5(b), Article III sa Republic Act 7610.
Ang pagkasikop sa suspek gihimo pinasikad sa warrant of arrest nga giisyu ni Hon. Florendo Bolante Opay, Presiding Judge sa Family Court, Ninth Judicial Region, Branch 6, Dapitan City, nga adunay girekomendar nga piyansa nga P200,000.00 alang sa iyang temporaryong kagawasan.
Ang dinakpan anaa na sa kustodiya sa Polanco MPS alang sa tukmang disposasyon.(MEDALYN U. BORJA)
Source: ZNPPO