Sa nagpadayon nga kampanya sa pagpanalipod sa pawikan samtang nagkadool ang peak season sa nesting, gipasiugdahan ni Atty. Gratian Paul Tidor sa CENRO Dipolog ang usa ka edukasyonal nga panaghisgot kabahin sa kahimtang sa marine ug coastal ecosystems, ilabina ang kahinungdanon sa pagpanalipod sa pawikan nga giisip na karon nga nagkinahanglan ug paspas nga aksyon.
Gipatin-aw ni Atty. Tidor ang risgo nga nag-atubang sa sea turtles ug ang dako nilang papel sa ekosistema, ilabina sa pagmintinar sa balanse sa dagat. Ang aktibidad, nga kabahin sa Lifelab 2025 theme nga “Caring for Our Common Home: An Environmental Responsibility,” nagtumong sa pagdasig sa kabatan-onan nga mahimong modelo sa environmental stewardship.
Gipakita sa mga estudyante ang ilang interes samtang mitungha ug dako nga pasalamat sa higayon nga makakat-on direkta gikan sa usa ka conservation advocate. Sa iyang presentasyon, naghatag si Tidor ug praktikal nga lakang nga mahimo nilang masugdan sulod sa eskwelahan ug sa komunidad aron makatabang sa pagpanalipod sa kinaiyahan ug sa pagpreserbar sa atong natural nga bahandi.(IKEN B. GULLEM)
Source: Dipolog Community School Inc. – DCS Inc