Gipahigayon sa Local Project Monitoring Committee (PMC) sa Dipolog City ang inspeksyon sa nag-unang nagpadayong proyekto sa siyudad niadtong Disyembre 1, 2025, aron masuta ang progreso ug pagtuman sa mga plano alang sa lokal nga kalamboan.
Lakip sa gi-inspeksyon ang tulo ka mayor nga imprastraktura: ang pagtukod sa City Central Public Market, ang konstruksyon sa bag-ong Sangguniang Panlungsod Building, ug ang padayon nga pagtrabaho sa By-pass ug Diversion Roads nga naglangkob sa NRJ Biasong–Minaog Bypass Road. Gitumong sa grupo nga masiguro nga hapsay, episyente, ug sulod sa tukmang timeline ang pag-implementar sa mga proyekto.
Sa wala pa ang site inspection, nagpahigayon ang PMC ug miting alas-9 sa buntag didto sa Office of the City Planning and Development, diin gituki ang updates, mga isyu, ug koordinasyon alang sa mas epektibong monitoring.
Pinaagi sa regyular nga pagbisita sa proyekto, nagpadayon ang PMC sa ilang paningkamot nga mahatagan ang katawhan ug kalidad nga imprastraktura nga makatabang sa mas paspas nga serbisyo publiko ug ekonomikong paglambo sa Dipolog City.(IKEN B. GULLEM)
Source: DILG Dipolog