Napili sa mga opisyales sa Regional Population and Development Management Committee (RPDMC) Rehiyon IX ang Teen Center sa Zamboanga del Norte National High School isip usa ka modelo nga programa alang sa mga kabatan-onan human kini ilang gibisita sa alang sa benchmarking activity niadtong Marso 10 sa Dipolog City.
Ang maong pagbisita gipangulohan ni Leticia Dolores II C. Abao, regional director sa Commission on Population and Development Region IX uban sa mga population program officers gikan sa lain-laing lokalidad sa Zamboanga Peninsula aron tan-awon ang mga epektibong serbisyo sa maong teen center.
Sa maong pasilidad, makadawat ang mga estudyante og counseling, emotional support ug career guidance nga makatabang kanila sa pagsulbad sa personal nga problema ug sa pagdesisyon alang sa ilang kaugmaon.
Sumala kang Joselito S. Tizon, principal sa eskwelahan, ang Teen Center nahimong luwas nga lugar diin ang mga estudyante makapangayo og tambag ug tabang, ilabi na sa mga isyu sama sa teenage pregnancy ug mental health.
Gisuportahan usab ang kalihukan sa probinsyal nga gobyerno sa Zamboanga del Norte ubos sa liderato ni Darel Dexter T. Uy pinaagi sa Provincial Population Office, aron mapalig-on pa ang mga programa nga nag-atiman sa kaayohan sa kabatan-onan.(IKEN B. GULLEM)
Source: Zamboanga del Norte Provincial News Network