Gibansay sa lokal nga gobyerno sa Dipolog City ang kapin 30 ka health workers sama sa doktor, pharmacist ug nurse sa Corazon C. Aquino Hospital aron masabtan ug masunod ang mga regulasyon sa pagdumala sa mga kontroladong tambal atol sa Training Orientation on S2 Licensing Compliance gipahigayon pinaagi sa City Human Resource Management and Development Office (CHRMDO) niadtong Marso 10 sa Social Hall sa City Hall.
Tumong sa orientation nga mapahibalo ang mga health professionals sa mga kinahanglanon sa Philippine Drug Enforcement Agency (PDEA) alang sa S2 license, usa ka permit nga gikinahanglan sa mga medical practitioners ug establisemento nga nagdumala sa regulated medicines.
Gipatin-aw sa mga resource speakers nga ang hustong pagsunod sa proseso ug regulasyon makatabang sa paglikay sa legal nga problema ug sa posibleng risgo sa institusyon, ilabi na sa pagdumala sa sensitibong medisina.
Samtang, gipangunahan ang lecture ni Novel Sonny Peñaflor, DDRO III sa PDEA Region IX, uban nila Shela Tan ug Joseph Edmund Sumantra nga naghatag og giya sa aplikasyon, responsibilidad sa mga practitioner, ug sa husto nga implementasyon sa S2 licensing rules.(IKEN B. GULLEM)
Source: Dipolog City Government