Andam na ang Team RSL Sindangan Ballers sa ilang pag-apil sa National Youth Basketball League Northern Mindanao Region 10 nga ipahigayon karong Enero 2 hangtod 6, 2026, sa Tangub City People’s Gymnasium sa Tangub City, Misamis Occidental, alang sa 14-under category nga natawhan og 2011.
Labaw pa sa lokal nga dungog ang gitamdan sa torneyo, tungod kay ang kampiyon nga koponan adunay dakong tsansa nga makadula sa international stage lakip sa Dubai, Thailand, ug Singapore, ug makaatubang og mga basketball team ug players gikan sa lain-laing nasod. Apil usab sa premyo ang Champions Trophy, medals sa tanang players, Mythical Five medals, ug Best Coach certificate ug medal.
Alang sa Team RSL Sindangan, ang NYBL dili lang kompetisyon kundili hagdanan padulong sa mas lapad nga oportunidad sa internasyonal nga basketball. Nagdala sila sa paglaum sa ilang lungsod ug sa pangandoy nga mapataas ang bandera sa Sindangan sa gawas sa nasod pinaagi sa disiplina, paningkamot, ug kusog nga panaghiusa sa court.(JENIFFER JR. DELICA)
Photo Courtesy: Sindangan Cultural Affairs, Sports, and Tourism Dev’t Office