Aron mas lig-on pa ang seguridad ug pagpatuman sa balaod sa dakbayan, pormal nga gidawat sa Cebu City Police Office (CCPO) ang 80 ka bag-ong kapulisan gikan sa Batch “Legions” sa Police Regional Office 7 (PRO7) niadtong buntag sa Enero 3, 2026 sa CCPO Parade Ground.
Personal nga gidawat sa Officer-in-Charge sa CCPO, PCOL George V. Ylanan, ang mga bag-ong personnel. Sa karon, temporaryo silang gi-assign sa City Mobile Force Company (CMFC) aron dugangan ang pwersa ug mapaligon ang ka-andam sa operasyon sa kapulisan.
Ang pagdeploy sa 80 ka kapulis tumong nga mapalig-on ang katakus sa CCPO sa crowd control, public safety operations, disaster response, ug suporta sa mga operasyon sa kapulisan, ilabi na panahon sa dagkong kalihokan ug mga sitwasyo nga para seguridad sa Cebu City.
Atol sa pagdawat, gihatagan og pahimangno ni PCOL Ylanan ang mga bag-ong personnel nga magpabiling disiplinado, propesyonal, matinud-anon sa katungdanan, mosunod sa balaod ug motahod sa tawhanong katungod sa ilang pag-alagad.Nagpasalamat usab si PCOL Ylanan sa ilang tabang atol sa Yuletide Season operations nga bag-o lang nahuman. Matod pa niya, mobalik ra usab ang mga personnel sa Regional Mobile Force Battalion (RMFB) human sa ilang temporaryong assignment sa CCPO.
Padayon ang Cebu City Police Office sa ilang paningkamot nga mapadayon ang kalinaw ug kahapsay ug masiguro ang kaluwasan sa katawhan pinaagi sa aktibo, matinud-anon, ug naka base sa komunidad nga pagserbisyo sa kapulisan.
Source: CCPO
I via Renante Socia Lada