Gipakusog sa Police Regional Office 7 (PRO7) ang ilang kampanya batok iligal nga sugal sulod sa 2025, nga miresulta sa pagdakop sa 4,220 ka personalidad sa 2,743 ka operasyon gikan Enero 1 hangtod Disyembre 31 sa tibuok Central Visayas.
Lakip sa giatubang sa mga operasyon ang tanang matang sa iligal nga sugal sama sa illegal number games, baraha, dice, mahjong, cara y cruz (hantak), sabong, online sabong, ug uban pang iligal nga pamaagi sa sugal nga makadaut sa kalinaw ug kaayohan sa komunidad.
Tungod sa kampanya, nakuha usab sa kapulisan ang kapin ₱620,338 nga bet money, nga nagpakita sa hugot ug padayon nga baruganan sa PRO7 batok iligal nga sugal nga kasagaran konektado sa uban pang kriminal nga kalihokan.
Matod sa PRO7, ang kalampusan sa kampanya resulta sa tinabangay nga paningkamot sa regional units, provincial offices, city ug municipal police stations, uban sa tabang sa komunidad pinaagi sa mga report ug intelligence-driven nga operasyon.
Miingon si PBGen Redrico A. Maranan, Regional Director sa PRO7, nga importante ang kooperasyon sa publiko: “Illegal gambling erodes discipline, damages families, and disrupts peace in our communities. We strongly encourage everyone to abide by the law and choose lawful means of livelihood. PRO7 will continue to enforce the law fairly and firmly to ensure a safe and orderly Central Visayas.”
Source: PRO7 PIO
I via Renante Socia Lada