Dipolog: Talamdan alang sa pagbahig sa basura giluwatan sa city ENRO

0
0

Mipagawas bag-ohay pa lang ang buhatan sa City Environment and Natural Resources, (CENRO) ning siyudad sa gabay o talamdan alang sa tukmang pagbahig sa mga basura, pinasikad sa Akta Republika no. 9003 ug City Ordinance no. 123, subay sa programa sa Solid Waste Management System sa atong kagamhanan.

Sumala pa sa nasayran, nga subay sa pagpalig-on ning maong programa, hugtanon karong gihangyo ang tananag mga kabalayan, opisina ug establismento sa pagsanong pinaagi sa pagbaton na sa “color-coded” nga mga basurahan alang sa mga binahig nga  basura.

Matud pa nga sugod sa Agosto 15, karong tuiga, hugtanong gi-awhagan ang atong mga   katawhan sa pagsanong ning maong gabay alang sa tukmang pagbahig ug sa paglabay sa atong basura.

Gipaklaro ni City ENRO, Mercedita Guerrero, nga isip kabag-ohan, adunay lima (5) ka mga matang sa basura, basi sa gabay gikan sa DENR-EMB sama ning mosunod:

1) Kolor GREEN, alang sa mga basurang “Malata” (Biodegradable) nga paga-kuhaon sulod sa mga adlaw sa Lunes ug Biernes (sama sa biyang mga pagkaon, panit sa utanon ug prutas, pinutlan sa kahoy, dahon, ginhawaan sa isda, manok,  ug ubang mga malate).

2) Kolor BLUE, alang sa mga “magamit pa pag-usab” (Recyclable) nga paga-kuhaon sa adlaw’ng Miyekules, (sama sa mga papel, plastic, karton, botelya ug ubang susama).

3) Kolor BLACK, alang sa “dili na magamit” (Residual) nga paga-kuhaon sa adlaw’ng Martes, Huwebes ug Sabado, (sama sa sanitary napkins,diapers, single-use plastic, sachets ug ubang susama).

4) Kolor YELLOW, alang sa mga “Infectious/Covid wastes” nga paga-kuhaon sa matag adlaw nga Miyerkules (sama sa facemasks, surgical gloves, syringe ug ubang susama), ug

5) Kolor RED, alang sa mga “Special / Bulky Waste” nga paga-kuhaon sa matag adlaw nga Miyerkules (sama sa mga guba nga appliances, electroninc devices, basiyo sa pintal, guba nga baterya, mga produktong panglimpiyo ug ubang susama).

Matud pa nga aron maka menos sa gasto, ang mga daang basurahan ang mahimong paga-pintorahan lang sa mga kolor nga nahisgotan sa unahan alang sa mga matang sa basura, aron dali ra kining mailhan sa mga garbage collector.

Dugang usab nga gihangyo ni City Enro Guerrero, nga atong likayan ang pagpagawas sa atong basura sa gabii pa lang, kon dili igawas kini sa sayong buntag, partikular na sa pag-abot sa garbage truck, aron  dili bungkagon sa mga iro nga maoy samot maka-pahugaw sa atong palibot.

Ang mga paglapas ning maong gabay alang sa tukmang waste segregation, ingon man sa paglabay sa basura ang hayan mapahamtangan sa molta nga gitakda sa ordinansa no. 123 ning atong siyudad.

Source: DIPOLOG CITY GOVERNMENT Facebook page

LEAVE A REPLY

Please enter your comment!
Please enter your name here