Pormal nga gitugyan ni City Mayor Darel Dexter T. Uy, duyog sa pagsaksi nila ni City Veterinarian, Dr. Imelda Villacrusis, City Agriculturist, Engr. Kerr Porlas ug City Disaster Risk Reduction Management Officer, Atty. Arvin Bonbon, ang duha ka managlahing tseke isip ayuda ngadto sa duha ka mga negosyante og litson dinhi sa dakbayan, kansang operasyon ang na-apektuhan sa “African Swine Fever” (ASF) niadtong bulan sa Disyembre, sa nakalabay nga tuig.
Sa nasayran, temporaryong gipahunong sa kagamhanang lokal ning siyudad ang operasyon sa negosyo sa nasangpit nga mga negosyante, human nakitang nag-positibo ang pipila ka mga baboy sa ASF niadtong nakalabay nga bulan.
Gumikan sa maong kalamboan, temporaryong gipatuman ang pag-cordon sa 500 meter radius gikan sa mga dapit nga gi-gikanan sa mga baboy, diin ang tanang mga baboy nga naka-uban sulod sa tangkal sa lima ka mga baboy nga nag-positibo ang gihurot sa pagdispatsar pinaagi sa pagpatay ug pagpalubong niini, uban sa temporaryong pagpahunong usab sa operasyon sa nahisgotang mga negosyante.
Tungod sa maong kahimtang, nagkuha na usab og laing 74 ka mga samples sa mga baboy gikan sa susamang dapit, og gipadala kini ngadto sa Bureau of Animal Industry (BAI) sa kaulohang Manila alang sa confirmatory test.
Human sa halos duha ka semana, ang74 ka mga samples ang matud pa “nag-negatibo”.
Gumikan sa temporaryong pagsuspenso sa ilang panginabuhian tungod sa pagpadayon sa pagpa-ilawom sa ilang nasangpit nga dapit – litsonanan sulod sa 60 ka adlaw nga “disinfection period” gilugwayan ang nahisgotang mga negosyante sa ayuda, aron makatabang sa paghulip sa ilang nawalang kita panahona.sulod ning mga panahona.
Subay niini, mainitong mipaabot sa ilang kinasing-kasing nga pasalamat ang nahisgotang mga negosyante ngadto sa kagamhanang lokal ning siyudad, ilabi na ngadto ni City Mayor Darel Dexter T. Uy, tungod sa maong kaayohan nga ilang nadawat.
(Source: Dipolog City Government Facebook page)