Nadakpan ang usa ka 26 anyos nga walay trabaho sa usa ka buy-bust operation nga gipahigayon sa kapulisan sa usa ka barangay sa Tabogon niadtong Abril 17, 2026.
Ang operasyon gihimo sa mga sakop sa Tabogon Municipal Police Station pasado alas-11:45 sa buntag uban ang koordinasyon sa Philippine Drug Enforcement Agency. Nakuha gikan sa suspek ang gibanabanang 10.15 gramos nga gidudahang shabu nga nagkantidad og ₱69,020.
Gawas sa ilegal nga drogas, nakit-an usab sa suspek ang usa ka caliber .45 nga pistola nga adunay unom ka buhing bala. Tungod niini, dugang nga kaso ang ipasaka batok kaniya ilawom sa balaod batok sa ilegal nga armas.
Ang suspek anaa na karon sa kustodiya sa kapulisan samtang ang mga nakuhang ebidensya gidala sa police station alang sa hustong dokumentasyon.
Sumala ni PCOL Abubakar Udang Mangelen Jr., nagpakita kini sa padayong kampanya sa kapulisan batok sa ilegal nga drogas ug armas. Giingon niya nga magpadayon ang ilang operasyon aron maprotektahan ang komunidad ug mapreserbar ang kalinaw ug kahapsay sa Cebu Province.
Source: CPPO
I via Renante Socia Lada