Nagpagawas og pahimangno ang Cebu Police Provincial Office aron mapalig-on ang kahibalo sa publiko bahin sa kaluwasan batok sa sunog.
Sa ilang public safety announcement, gipahinumduman ang katawhan nga likayan ang pagbiya sa giluto nga walay nagbantay, tungod kay usa kini sa kasagarang hinungdan sa sunog sa panimalay. Giawhag usab ang tanan nga ilayo ang mga dali masunog nga butang gikan sa init sama sa kalan ug heater.
Gidugang pa nga importante nga kanunay susihon ang electrical wiring ug mga outlet aron malikayan ang short circuit.
Girekomendar usab sa kapulisan nga tudluan ang mga miyembro sa pamilya sa saktong paagi sa pag-ikyas kung adunay sunog.
Lakip usab sa ilang pahimangno ang pagpalong sa mga appliances kung dili gamiton aron malikayan ang aksidente.
Sumala sa Cebu PPO, dako kaayo ang papel sa disiplina ug pag-amping sa matag panimalay aron malikayan ang sunog. Giawhag usab ang publiko nga sa oras sa emerhensya, mo tawagan dayon sa 911 alang sa paspas nga responde.
Ang maong kampanya kabahin sa padayong paningkamot sa kapulisan aron masiguro ang kaluwasan sa matag komunidad sa Cebu Province.
Source: CPPO
I via Renante Socia Lada