Padayon nga gipakusgan sa Cebu Police Provincial Office ang ilang operasyon batok sa mga paglapas sa balaod pinaagi sa OPLAN Bakal Sita, OPLAN Bulabog, ug Night Watch, nga miresulta sa pagkadakop sa 468 ka mga nakalapas sa lain-laing ordinansa sa tibuok Cebu Province.
Sa kinatibuk-an, 126 ka police operations ang gihimo aron targeton ang kasagarang paglapas sa kahapsay sa komunidad. Lakip niini ang pag-inom ug pagpanigarilyo sa pampublikong lugar, paglapas sa curfew sa mga menor de edad, paglakaw nga halos hubo sa publiko, ug paglapas sa traffic rules.
Sa 468 ka nadakpan, 213 ang gipamulta samtang 255 ang gipasidan-an ug gipagawas. Kadaghanan sa mga kaso may kalabutan sa pag-inom sa publiko (121), curfew violations (99), ug traffic violations (213), nga nagpakita nga kinahanglan pa ang hugot nga pagpatuman sa balaod.
Matud pa ni PCOL Abubakar Udang Mangelen Jr., tumong sa operasyon dili lang pagdakop kundili pagdisiplina ug pagpanalipod sa komunidad. Giawhag niya ang publiko nga motuman sa balaod aron mapadayon ang kalinaw ug kahapsay sa probinsya.
Gidayeg usab ni PBGEN Arnold Evangelista Abad ang paningkamot sa mga pulis, nga miingon nga importante ang presensya sa kapulisan aron mapugngan ang krimen.
Samtang, nagpadayag og suporta si Gob. Pamela S. Baricuatro sa maong kampanya ug giingong importante ang kooperasyon sa tanan aron mapadayon ang kalinaw ug kahapsay sa komunidad.
Gipasalig sa kapulisan nga magpadayon ang ilang operasyon uban sa pakigtambayayong sa lokal nga gobyerno aron masiguro ang kahapsay ug kaluwasan sa tibuok Cebu.
Source: CPPO
I via Renante Socia