Dipolog: Super Typhoon Mawar/Betty gipangandaman na sa syudad

0
5

Isip pag-preparar kon dunay kritikal nga panghitabo gumikan sa gikatakdang pag-abot sa Super Typhoon Betty nga dunay international name nga Mawar, ang kagamhanang lokal sa Dipolog pinaagi sa City Disaster Risk Reduction and Management Council (CDRRMC), ilawom sa chairmanship ni Mayor Darel Dexter T. Uy, ang mipatawag og tigum aron mapangandaman kon ugaling masinati sa dakbayan ang kalamidad.

Sa nasangpit nga tigum, gipasabot sa DOST-PAGASA pinaagi ni Ms. April Love Castillon nga ang Super Typhoon Mawar/Betty, base sa forecast track, ang mosulod sa Philippine Area of Responsibility (PAR) ugma (Mayo 26) sa gabi-e o kaha buntag sa Mayo 27 ning tuiga.

Kini maka-apektar sa dagan sa panahon diin gilaoman nga masinati ang madag-omon ngadto sa maulan nga panahon sugod karong adlawa hangtod sa adlaw’ng Dominggo, Mayo 27.

Sa latest forecast nga gipost sa nasangpit nga ahensiya kaganinang alas 4:00 ang takna sa buntag, ang Super Typhoon (based on all available data) anaa sa 2,130 km East of Southern Luzon.

Alayon ning maong sitwasyon, si Mayor Uy ang mi-awhag sa mga katawhan nga nanimuyo sa mga flood prone areas nga dili magmakuli sa pag-evacuate kon motaas na ang water level dinha sa mga kasubaan.

Dugang pag-awhag usab sa mga kabaranggayan nga samtang sayo pa, pamutlon na ang mga kahoy nga nagdala og peligro sa palibot, ipahiluna sa luwas nga lugar ang mga buhing hayop samtang kadtong anaa sa mga coastal barangay ang kinahanglang magmabinantayon sa gikusgon sa hangin.

Gipahinumduman usab ni Atty. Arvin L. Bonbon, CDRRM Officer, ang mga barangay sa contingency plan alang sa “awareness” ug “preparedness” kon masinati man gani ang mga kritikal nga panghitabo.

Nasayran nga ning kasamtangan, ang buhatan sa City Social Welfare and Development (CSWD) ug CDRRM ang nangandam na usab sa mga food packs ug relief goods, samtang mipahayag usab ang ubang ahensiya sa gobyerno sa ilang suporta kon aduna man gani panginahanglanon sa evacuation and rescue operations.

(Source: Dipolog City Government Facebook page)

Leave a Reply