Milanog sulod sa session hall sa Sangguniang Panlalawigan sa Zamboanga del Norte kagahapon, Hulyo 7, ang diskusyon kabahin sa mga personalidad nga mibotar og “YES” sa pagahimuon nga mining exploration sa lungsod sa Sindangan nga matud pa, dili man unta sila lehitimo nga mga miyembro ug leaders sa Subanen Tribe.
Ang maong exploration moigo sa dakong bahin sa lima ka Barangay sa Sindangan sama sa Titik, Tinaplan, Bato, Bucana, og Dagohoy, hinungdan sa pagbabag sa mga anaa sa posisyon sa Subanen Tribe tungod posible kining makadaot sa kalikupan og sa ilang panginabuhian. Una na diha ang dakong produksyon nga gigikanan sa ilang tubig, mga bungtod og kahoy nga pwedeng maopaw, og mga natural nga mga minerales nga anaa mismo sa ilang ancestral nga luna.
Tungod niana, mipasaka ang Indigenous People (IP) og Resolution of not Consent pipila ka bulan na ang milabay arun ipakita ang oposisyon sa maong eksplorasyon. Apan, dako nilang katingala kay nakadawat silag ikaduhang desisyon kung asa adunay mga parehas nila ang mibotar og “YES” pero dili validated members o leaders.
Matud pa sa representante sa National Commission on Indigenous People, wala siya’y dokumento nga hawid arun mapamatud-an ang katinuod nga dili validated nga mga miyembro ang mibotar nga uyon sa mining exploration.
Hinuon ang gi-propose nga mining exploration anaa pa sa lebel sa pag kompleto og mga importanteng requirements og wala pay opisyal nga pagsugod sa maong aktibidad.
Sa laing bahin, opisyal usab nga mibarog tagsa-tagsa atubangan sa Media ang mga Subanen Tribe leaders sa nagkadaiyang barangay nga apektado sa eksplorasyon, og mipagawas sa ilang hugot nga desisyon nga “NO” o dili sila mouyon sa pagahimuon nga mining exploration.(JENIFFER JR. DELICA)