Nakapasa og resolusyon ang Sangguniang Panlalawigan sa Zamboanga del Norte nga nagkomendasyon ug nagpasidungog sa unom-anyos nga chess champion nga si Elisha A. Romarate tungod sa iyang talagsaong pasundayag sa 24th ASEAN Age Group Chess Championship sa Singapore.
Ang resolusyon nag-ila sa kalampusan ni Romarate nga nakakuha og walo ka gold medals, tulo ka silver medals ug usa ka bronze medal sa maong internasyonal nga kompetisyon nga gipahigayon niadtong Agosto 7 hangtod 17, 2026.
Gipresentar ang maong resolusyon pinaagi sa privilege speech ni 1st District Board Member Jimboy Chan, diin gipahayag sa mga miyembro sa Provincial Board, ubos sa pagpangulo ni Vice Governor Julius C. Napigquit, ang ilang pag-ila sa nahimo sa batang chess player.
Pinaagi sa resolusyon, giila sa Sangguniang Panlalawigan ang dakong kontribusyon ni Elisha sa pagdala og dungog sa iyang pamilya, eskwelahan, komunidad ug sa Pilipinas.
Giila usab ang suporta sa iyang amahan ug trainer nga si National Master Geronimo Romarate, coach nga si FA Sendelyn L. Magallanes sa Estaka Central School, ug Estaka Punong Barangay Irvin Banga.
Gilauman sa Provincial Board nga ang kalampusan sa batang kampeon mahimong inspirasyon sa ubang kabataan nga magpadayon sa pagpalambo sa ilang talento, disiplina ug dedikasyon sa ilang gipiling natad.(IKEN B. GULLEM)
Source: Sangunniang Panlalawigan of Zamboanga del Norte